Главная > Брак и семья > Положил еси на главах их венцы > ПРИЛОЖЕНИЕ

ПРИЛОЖЕНИЕ

Приложение

МОЛИТВЫ ПЕРЕД ВСТУПЛЕНИЕМ В БРАК И ХРИСТИАНСКИМ СУПРУГАМ

СВЯТИТЕЛЮ НИКОЛАЮ, АРХИЕПИСКОПУ МИР ЛИКИЙСКИХ, ЧУДОТВОРЦУ МОЛЯТСЯ О ЦЕЛОМУДРИИ И БЛАГОПОЛУЧНОМ ЗАМУЖЕСТВЕ ДОЧЕРИ

О всесвятый Николае, угодниче преизрядный Господень, теплый наш заступниче, и везде в скорбех скорый помощниче! Помози, ми, грешному и унылому, в настоящем сем житии, умоли Господа Бога даровати ми оставление всех моих грехов, елико согреших от юности моея, во всем житии моем, делом, словом, помышлением и всеми моими чувствы; и во исходе души моея помози ми, окаянному, умоли Господа Бога, всея твари Содетеля, избавити мя воздушных мытарств и вечнаго мучения, да всегда прославляю Отца и Сына и Святаго Духа и твое милостивное предстательство, ныне и присно и во веки веков. Аминь.


БЛАГОВЕРНОМУ КНЯЗЮ ПЕТРУ, В ИНОЧЕСТВЕ ДАВИДУ И КНЯГИНЕ ФЕВРОНИИ,
В ИНОЧЕСТВЕ ЕФРОСИНИИ, МУРОМСКИМ ЧУДОТВОРЦАМ МОЛЯТСЯ ПРИ ВСТУПЛЕНИИ В БРАК

О велиции угодницы Божии и предивнии чудотворцы, благовернии княже Петре и княгине Февроние, града Мурома предстателие и хранителие, и о всех нас усерднии ко Господу молитвенницы! К вам прибегаем и вам с упованием крепким молимся: вознесите о нас грешных святыя молитвы ваша ко Господу Богу, и испросите у благости Его вся благопотребная душам и телесем нашим: веру праву, надежду благу, любовь нелицемерну, благочестие непоколебимо, в добрых делех преуспеяние, мира умирение, земли плодоносие, воздуха благорастворение, телесем здравие и душам спасение. Исходатайствуйте у Царя Небеснаго Церкви Святей и всей державе Российстей мир, тишину и благоустроение, и всем нам житие благополучное и добрую христианскую кончину. Оградите отечество ваше, град Муром, и вся грады Российския от всякаго зла; и вся правоверные люди, к вам приходящии и святым мощем вашим покланяющимся, осените благодатным действом богоприятных молитв ваших, и вся прошения их во благо исполните. Ей чудотворцы святии! Не презрите молитв наших, со умилением вам днесь возносимых, но будите о нас приснии предстателие ко Господу и сподобите нас помощию вашею спасение вечное улучити и Царствие Небесное унаследовати; да славословим неизреченное человеколюбие Отца и Сына и Святаго Духа, в Троице покланяемого Бога, во веки веков. Аминь.


МУЧЕНИКАМ АДРИАНУ И НАТАЛИИ МОЛЯТСЯ О БЛАГОЧЕСТИИ БРАКА ВООБЩЕ

О священная двоице святии мученицы Христови, Адриане и Наталие, блаженнии супрузи и доблии страдальцы! Услышите ны, молящиеся вам со слезами, и ниспослите на ны вся благопотребная душам и телесем нашим, и молите Христа Бога, да помилует нас и сотворит с нами по милости Своей, да не погибнем во гресех наших! Ей, святии мученицы, приимите глас моления нашего и избавите ны молитвами вашими от глада, губительства, труса, потопа, огня, града, меча, нашествия иноплеменников и междоусобныя брани, от напрасныя смерти и от всех бед, печалей и предстательством укрепляемии, прославим Господа Иисуса Христа, Ему же подобает всякая слава, честь и поклонение, со Безначальным Его Отцем и Пресвятым Духом, во веки веков. Аминь.


МОЛИТВА НА БРАНЬ БЛУДА

Боже сил исцеляй всяк недуг; и всякую язю в людех, очисти рабы Твоя, и не даждь человеку и демону приобщения, запрети нечистым духом, сокруши сатану под ноги рабов Твоих, обнови я святым Твоим Духом, соедини я святей Твоей Церкви, и всякаго действа противолежащаго избавивый, представи святому Твоему жертвеннику, и небесных Твоих и животворящих Таин сподоби. Яко Ты Бог наш, Бог кающихся, и Тебе славу возсылаем, Отцу и Сыну и Святому Духу, ныне и присно и во веки веков. Аминь.


МОЛИВА ОТ ОСКВЕРНЕНИЯ

Господи Боже наш, Едине Благий и Человеколюбче, Едине Святый и на святых почиваяй, иже верховному Твоему апостолу Петру явивый видением, ничтоже скверно, или нечисто мнети, от Тебе сотворенных на пищу и в наслаждение человеком, и сосудом Твоим избранным, апостолом Павлом вся чиста чистым заповедавый: Ты Сам Владыко Пресвятый призыванием страшнаго и пречистаго Твоего Имене, и знамением Честнаго и Животворящего Креста, благослови и очитсти мя раба Твоего (имя), осквернившагося от всякаго неприязненного духа, от всякаго мечтания и гада ядовитого, от всякаго беззакония и от всякия лести, от всякаго потвора и от всякия суеты, и от всякаго недуга, и всякия язи, и от всякаго противного злодейства диаволя. И ныне мене недостойнаго раба Твоего (имя): сподоби по Твоему милосердию служити пречистым Твоим Тайнам. И прежде очисти ми душу и тело от всякие скверны, и остави всякое прегрешение, волльное и невольное, еже согреших во вся дни живота моего, делом, словом и помышлением, во дни и в нощи, и до нынешняго часа. И даждь ми, Господи, служение сие страшное небесных Чинов, и причастие Пречистых Твоих Таин, не в суд, не в осуждение, но в прощение грехов, и в Духа Святаго пришествие, и живот присносущныя радости, егоже уготовал еси истинным Твоим служебником. Сохрани мя, Владыко Всесильне, от всякаго греха и злобы, соблюди нескверна и непорочна от всякия проказы противнаго диавола: и даждь ми, Господи, служити Тебе в преподобии и правде до последнаго дне и часа и скончания моего: Ты бо еси благословляяй и освещаяй всяческая, Христе Боже наш, и Тебе славу возсылаем, со безначальным Твоим Отцем, и с Пресвятым и Благим и Животворящим Твоим Духом, ныне и присно и во веки веков, аминь.


ПРЕД ФЕОДОРОВСКОЮ ИКОНОЮ БОЖИЕЙ МАТЕРИ

О Премилосердная Госпоже, Царице Богородице! Приими смиренное моление наше, и не отрини нас, заступление и прибежище наше, и не возгнушайся нас недостойных, но, яко милосердная Мати, непрестани молящи, Егоже родила еси, да дарует нам прощения многих согрешений наших, да спасет нас имиже весть судьбами. Помилуй нас, Владычице, помилуй нас, несть бо нам спасения от дел. Темже верно вопием Ти: помилуй рабы Твоя (имена) и неплодное сердце наше покажи плодоносно делы благими. Призри на нас недостойных, Ты бо еси упование и покров наш, жизнь и свет сердцу нашему. Яко невечерний свет от чрева Твоего воздвигшая, озари душу нашу, и отжени всякую мглу от сердца нашего. Даруй нам умиление, покаяние и сокрушение сердечное. Сподоби нас во вся дни жизни нашея творити волю Сына Твоего и Бога нашего и во всем благоугождати Ему единому. О Богомати! Не престани молящи Рождшагося от Тебе за вся притекающия с верою к сему святому образу Твоему, и подавая им скорую помощь и утешение в скорбех и напастех и злостраданиих, избави их от клеветы и злобы человеческия, от враг видимых и невидимых и всякия нужды и печали. Спаси Отечество наше, град сей и вся грады и страны от всяких бед и нужд и сотвори милостива нам быти Бога нашего, отврати всякий гнев Его, на ны движимый, избави ны от належащаго и праведнаго Его прещения. О Боголюбивая Владычице, Ангелов украшение, мучеников славо и всех святых радосте! С ними моли Господа, да сподобит нас в покаянии скончати жизни нашея течение. В смерти же час, Пресвятая Дево, избави нас от власти бесовския, и осуждения, и ответа, и страшнаго испытания, и мытарств горьких, и огня вечнаго, да сподобльшеся славнаго Царствия Божия, величаем Тя и славим воплощшагося от Тебе Христа Бога нашего, емуже слава со Отцем и Святым Духом, ныне и присно и во веки веков. Аминь.


ПРЕД ПОЧАЕВСКОЮ ИКОНОЮ БОЖИЕЙ МАТЕРИ

К тебе, о Богомати, молитвенно притекаем мы, грешнии, чудеса Твоя во Святей Лавре Почаевстей явленныя поминающе и о своих сокрушающеся прегрешениих. Вемы, Владычице, вемы, яко не подобаше нам грешным чесого просити, токмо о еже Праведному Судии беззакония наша оставити нам. Вся бо, нами в житии претерпенная, скорби же и нужды и болезни, яко плоды падений наших прозябоша нам, Богу сия на исправления наше попущающу. Темже вся сия истиною и судом Своим наведе Господь на грешныя рабы Своя, иже в печалех своих к заступлению Твоему, Пречистая, притекоша, и во умиление сердец к Тебе взывают сице: грехов и беззаконий наших, Благая, не помяни, но паче всечестныя руце Твоя воздвигши, к Сыну Твоему и Богу предстани, да люте содеянная нами отпустит нам, да, за премногая неисполненная обещания наша, лица Своего от рабов Своих не отвратит, да благодати Своея, спасению нашему пособствующия, от душ наших не отымет. Ей, Владычице, буди спасению нашему Ходатаица, и малодушия нашего не возгнушавшися, призри на стенания наша, яже в бедах и скорбех наших пред чудотворным Твоим образом возносим. Просвети умиленными помыслы умы наша, веру нашу укрепи, надежду утверди, любве сладчайший дар сподоби нас прияти. Сими убо, Пречистая, дарованьми, а не болезньми и скорбьми живот наш ко спасению да возводится, но от уныния и отчаяния души наша ограждающи, избави нас маломощных от находящих на ны бед и нужд, и клеветы человеческия, и болезней нестерпимых. Даруй мир и благоустроение жительству христианскому предстательством Твоим, Владычице; утверди православную веру во стране нашей и во все мире. Церковь Апостольскую и Соборную умалению не предаждь, уставы святых отец навеки непоколебимы сохрани, и всех к Тебе притекающих от рова погибельного спаси. Еще же и ересию прельщенных братий наших, или веру спасительную во греховных страстех погубивших, паки ко истинней вере и покаянию приведи, да вкупе с нами Твоему чудотворному образу поклоняющеся, Твое предстательство исповедят. Сподоби убо нас, Пресвятая Госпоже Богородице, еще в животе сем победу истины Твоим заступлением узрети; сподоби нас благодатную радость прежде кончины нашея восприяти, якоже древле насельники почаевския Твоим явлением победителей и просветителей агарян показала еси; да вси мы, благодарным сердцем вкупе со Ангелы и пророки и Апостолы и со всеми святыми Твое милосердие прославляюще, воздадим славу, честь и поклонение в Троице воспеваемому Богу, Отцу и Сыну и Святому Духу, во веки веков.


ПРИ РОДАХ


МОЛИТВА КО ПРЕСВЯТОЙ БОГОРОДИЦЕ

Пресвятая Дево, Мати Господа нашего Иисуса Христа, яже веси рождение и естество матере и чада, помилуй рабу Твою (имя), и помози в час сей, да разрешится бремене своего благополучно. О Всемилостивая Владычице Богородице, яже не потребовала еси помощи в рождении Сына Божия, подаждь помощь сей рабе Твоей, помощи требующей, наипаче же от Тебе. Даруй ей благомощие в час сей, и младенца иже мать родитеся и внити в свет мира сего, сподоби в благопотребное время и умнаго света во святем крещении водою и духом. Тебе припадаем, Мати Бога Вышняго, молящеся: Буди милостива мати сей, ейже прииде время быти мати, и умоли воплотившагося из Тебе Христа Бога нашего, да укрепит ю силою Своею свыше. Яко держава Его благословенна и препрославлена, со Безначальным Его Отцем, и Пресвятым и Благим и Животворящим Его Духом, ныне и присно и во веки веков. Аминь.


МОЛИТВА КО ГОСПОДУ ИИСУСУ ХРИСТУ

Господи Иисусе Христе, Боже наш, от Превечнаго Отца рожденный Сыне прежде всех век, и в последния дни, благоволением и содействием Святаго Духа, изволивый рождену быти от Пресвятыя Девы яко младенцу, повиену и положену во ясли. Сам Господи, в начале сотворивый человека и жену спрягий ему, заповедь дав им: Раститеся, и множитеся, и наполняйте землю; помилуй по велицей милости Твоей рабу Твою (имя), готовящуюся родити по заповеди Твоей. Прости ей вольныя и невольныя грехи, благодатию Твоею даруй ей силу благополучно разрешитися от бремене своего, сохрани сию и младенца во здравии и благопомощи, огради я Ангелы Твоими и сохрани от неприязненнаго действия лукавых духов, и от всякия вещи злыя. Яко Благ и Человеколюбец Бог еси, и Тебе славу возсылаем, Отцу и Сыну и Святому Духу, ныне и присно и во веки веков. Аминь.


ПРИ КОРМЛЕНИИ


ПРЕД ИКОНОЮ БОЖИЕЙ МАТЕРИ "МЛЕКОПИТАТЕЛЬНИЦА"

Тропарь, гл. 3: Без семене от Божественнаго Духа, волею же Отчею зачала еси Сына Божия, от Отца без матере прежде век суща, нас же ради из Тебе без Отца бывша, плотию родила еси и Младенца млеком питала еси, тем же не престай молити избавитися от бед душам нашим. Кондак, гл.5: Душ наших чувствия очистиши, узрим на иконе таинство преславное, Творца вселенныя и Господа вышних сил, во объятиях держима и от сосцу Твоею яко Младенца питаема, и со страхом и радости. Поклоняющеся Тебе, Спасу нашему, воззовем: Радуйся, Владычице, жизни нашея питательница.


МОЛИТВА

Приими, Госпоже Богородительнице, слезные моления рабов Твоих, к Тебе притекающих: зрим Тя на святей иконе, на руках носящую и млеком питающую Сына Твоего и Бога нашего, Господа Иисуса Христа: аще и безболезненно родила еси Его, обаче матерния скорби веси и немощи сынов и дщерей человеческих зриши: темже тепле припадающе к цельбоносному образу Твоему и умиленно сей лобызающе, молим Тя, всемилостивая Владычице, нас грешных, осужденных в болезнех родити и в печалех питати чада наша, милостивно пощади и сострадательно заступи, младенцы же наша, такожде и родившия их, от тяжкаго недуга и горькия скорби избави, даруй им здравие и благомощие, да и питаемии от силы в силу возрастати будут, и питающия их исполнятся радостию и утешением, яко да и ныне предстательством Твоим из уст младенец и ссущих Господь совершит хвалу Свою. О Мати Сына Божия! Умилосердися на матере сынов человеческих и на немощные люди Твоя: постигающия нас болезни скоро исцели, належащия на нас скорби и печали утоли, и не презри слез и воздыханий рабов Твоих, услыши нас в день скорби пред иконою Твоею припадающих, и в день радости и избавления приими благодарная хваления сердец наших, вознеси мольбы наша ко престолу Сына Твоего и Бога нашего, да милостив будет ко грехом и немощем нашим и пробавит милость Свою ведущим имя Его, яко да и мы, и чада наша, прославим Тя, милосердную заступницу и верную надежду рода нашего, во веки веков. Аминь.